WASIMAMIZI WASAIDIZI WA UCHAGUZI NGAZI YA KATA JIMBO LA CHEMBA WAPATIWA MAFUNZO

Posted on: August 4th, 2025

Wasimamizi  wasaidizi wa Uchaguzi ngazi ya KataJimbo la Chemba wameanza kupatiwa mafunzo ya uchaguzi  ya siku tatu leo tarehe 4, Agosti 2025 ikiwa ni   sehemu ya maandalizi kuelekea uchaguzi Mkuu wa mwaka 2025 na kuwawezesha wasimamizi wasaidizi kutekekeza majukumu yao ipasavyo.

Mafunzo hayo yanayofanyika ukumbi wa mikutano wa Halmashauri yamefunguliwa na Msimamizi wa uchaguzi Jimbo la Chemba Ndugu Dominick Ruhamuya ambaye amewataka Wasimamizi wasaidizi kutambua kuwa dhamana waliyopewa kusimamia na kuratibu uendeshaji wa uchaguzi wa Rais, Wabunge na Madiwani ni kubwa, nyeti na muhimu kwa mustakabali wa Taifa letu, hivyo wanategemewa kuzingatia utendaji wao, wawajibike ipasavyo katika kipindi chote hadi hapo jukumu hili la uchaguzi litakapokamilika.

Aidha, Ndugu Dominick  amewaasa Wasimamizi Wasaidizi wa uchaguzi kuwa pamoja na uzoefu ambao baadhi yao wanao katika uendeshaji wa uchaguzi wasiache kusoma katiba, sheria, kanuni, taratibu, miongozo na wafuate na kutekeleza  maelekezo mbalimbali yatakayokuwa yanatolewa na Tume.

"Fanyeni utambuzi wa vituo vya kupigia kura mapema ili kubaini mahitaji maalum ya vituo husika na kuhakikisha kunakuwa na mpangilio mzuri ambao utaruhusu uchaguzi kufanyika kwa utulivu na amani" amesema Ruhamuya

Mafunzo hayo yanajumuisha Washiriki 52 kutoka Kata 26 za Halmashauri ya Wilaya ya Chemba ambao ni wasimamizi wasaidizi ngazi ya Kata na jumla ya mada kumi zitawasilishwa katika mafunzo hayo.

Wasimamizi Wasaidizi hao wamekula kiapo cha kutunza siri na kutoa tamko la kujitoa  uanachama wa chama cha siasa kabla ya kuanza  mafunzo.

Uchaguzi Mkuu wa Rais, Wabunge na Madiwani unatarajiwa kufanyika tarehe 29, Oktoba 2025

    "KURA YAKO HAKI YAKO JITOKEZE KUPIGA KURA"