“DHAMIRA YA SERIKALI NI KUPUNGUZA AU KUMALIZA KABISA VIFO VINAVYOTOKANA NA UZAZI”

Posted on: October 2nd, 2025

Kauli hiyo imetolewa na Mkuu wa Mkoa wa Dodoma Mhe. Rosemary Senyamule  alipotembelea ujenzi wa mradi wa Kituo cha afya Dalai ikiwa ni sehemu ya ziara yake ya kikazi kutembelea miradi ya maendeleo  ndani ya Wilaya ya Chemba  Oktoba  2, 2025 ambapo ametembelea miradi ya Elimu na AFya Kata ya Mondo, Dalai na Songolo.

“Ukamilishaji wa ujenzi wa vituo vya huduma za afya katika Wilaya za Mkoa wa Dodoma utasaidia kusogeza karibu na Wananchi huduma bora  za afya pamoja na kuokoa maisha ya Wananchi pindi inapotokea  dharura ya ajali na matukio mengine yanayohitaji huduma za haraka za kitabibu” amesema RC Senyamule.

Mradi wa  ujenzi wa Kituo cha Afya Dalai unajengwa  kwa fedha  shilingi milioni 686.5 ambapo fedha kutoka Serikali Kuu ni shilingi milioni  678.7 na  michango ya nguvu  za Wananchi ni shilingi milioni 10.8.

Akiwa kwenye mradi wa Zahanati katika Kata  ya Songolo Mhe. Senyamule amepongeza hatua ulipofikia mradi huo ambapo taarifa ya utekelezaji wa mradi huo imeeleza kuwa  mradi huo umegharimu shilingi milioni 60  fedha kutoka Serikali Kuu  na nguvu za Wananchi shilingi milioni 10 ili kuunga mkono juhudi za Serikali, mradi huo unatarajiwa kukamilika  Novemba 30, 2025 ambapo kwasasa  umefikia 65% ya utekelezaji.

Aidha akiwa katika Mradi wa miundombinu ya elimu Shule ya Msingi Mondo ambao unahusisha ujenzi wa vyumba viwili vya madarasa  kwa shilingi  milioni 46 fedha kutoka Serikali Kuu na ujenzi wa matundu 21 ya vyoo  kwa shilingi milioni 49.4 fedha kutoka mpango wa SRWSS Mhe. Senyamule amempongeza Mwalimu Mkuu wa Shule ya Msingi Mondo kwa usimamizi mzuri wa fedha za Serikali na ujenzi wa matundu 21 ya vyoo ambayo yamejengwa kwa kuzingatia ubora.

Ukamilishaji wa ujenzi wa miundombinu ya elimu Wilayani Chemba unatarajiwa kuongeza viwango vya ufaulu na kuwapunguzia Wanafunzi adha ya kutembea umbali mrefu kwenda shuleni, ambapo pia kukamilika kwa miundombinu ya miradi  ya Afya kutawapunguzia Wananchi adha ya kutembea umbali mrefu kwenda Vijiji vya jirani kutafuta huduma za afya.