Wananchi Wa Chemba Watakiwa Kujua Haki Zao Za Msingi Za Kisheria

Posted on: April 3rd, 2018

Na Shani Amanzi,

Wananchi wa Wilaya ya Chemba washauriwa kuhakikisha wanafahamu haki zao za kisheria ,pale wanapoona zimekiukwa na mtu binafsi,Serikali au Shirika lisilo la Kiserikali na kutambua kuwa hiyo haki inaweza patikana sehemu gani.

Mwanasheria wa Halmashauri ya Wilaya ya Chemba Ndg.Jofrey Pima aliyazungumza hayo alipokuwa ofisini kwake tarehe 03/4/2018 na kutaja baadhi ya migogoro ya ardhi iliyopo katika Halmashauri kuwa imegawanyika katika makundi  matatu na kuelezea  njia zipi zinatumika katika kutatua migogoro.

Ndg.Pima amesema migogoro ya Mipaka kati ya Wilaya ya Chemba na Wilaya jirani kama vile mgogoro wa mpaka uliowahi kutokea Wilaya ya Kiteto, Chemba na Bahi,Chemba na Singida mfano hai ni mgogoro wa Mpaka unaolalamikiwa na Wananchi  wa Kijiji cha Handa  Wilaya ya Singida  kuwa Wanachi wa Handa wamevamia hifadhi ya Msitu wa Migori

“Kwa hiyo Kamati ya Ulinzi na Usalama ya Wilaya ya Chemba na ya Wilaya ya Singida walishakutana na kutatua huo mgogoro, changamoto nyingine inayosababisha migogoro ya mipaka, ni maboya (becons) kutoonekani  kwa sababu baadhi ya wananchi wanang’oa maboya hayo na baadhi ya maboya kuwa mbalimbali changamoto ambayo inatakiwa kutatuliwa kwa kupunguza umbali kati ya boya moja na nyingine zinazoonekana kiurahisi ”alisisitiza Ndg.Pima.

Aidha Ndg.Pima amesema migogoro mengine ni mgogoro ya mipaka  baina ya vijiji na vijiji katika wilaya tofauti mfano ni kijiji cha Kidoka na kijiji cha Muungano kata ya Kidoka katika Wilaya ya Chemba wanalalamikia baadhi ya Wanachi wa Viijiji vya Haneti na Kwahenu Wilaya za Chamwino kuingia kwenye maeneo ya Vijiji hivyo vya Chemba. Mgogoro huu ulishaanza kushughulikiwa na  Wataalam kwa kubaini mipaka na Tamko la mipaka itatolewa na Wakuu wa Wilaya za Chemba na Chamwino muda si mrefu.

Naye Mkurugenzi Mtendaji wa Halmashauri ya Wilaya ya  Chemba Dkt.Semistatus Mashimba aliongeza kwa kusema  kuna migogoro ya umiliki wa Ardhi ambayo hutatuliwa na Wataalam wa Halmashauri na mengine inapelekwa kwenye vyombo vya kisheria ambavyo vimepewa mamlaka ya kushughulikia migogoro ya Ardhi ,Mabaraza ya Kata na Baraza la Ardhi la Wilaya ya Kondoa kutegemea thamani ya ardhi yenye mgogoro.

“Migogoro inayoletwa moja kwa moja  Ofisini kwangu  au kwa Mkuu wa Wilaya hushughulikiwa kwa kushirikisha Mwanasheria wa Halmashauri na Wataalam wa Ardhi,  na endapo itaonekana mgogoro huo unatakiwa kuamriwa na Mahakama wahusika huelekezwa kupeleka mgogoro huo kwenye Mahakama yenye Mamlaka ya kusikiliza mgogoro husika.”alisisitiza Dkt.Mashimba.

Hata hivyo  Malengo ya Halmashauri ni kutatua migogoro yote ya Wananchi waliyonayo katika Sekta ya Ardhi na Sekta Nyingine kama vile Kilimo na Mifugo, Mirathi na Ndoa.