Wananchi wa Chemba wapata mafunzo ya shamba darasa

Posted on: September 1st, 2018

Na Shani Amanzi,

 Mkuu wa Wilaya ya Chemba Mhe. Simon Odunga amewataka Maafisa Kilimo kuendelea kuwapa elimu Wakulima ili waache kulima kwa mazoea kwani Mafunzo ya Kilimo yanatolewa yatasaidia kuondoa njaa na kutekeleza maagizo ya Uongozi wa Awamu ya Tano ya Mhe.Rais Dkt. John Pombe Magufuli kuwa hakuna chakula cha kugawa bure kwa wasiotaka kufanya kazi.

Mhe. Simon Odunga amesema ndoto kubwa ya Serikali ni kutoa elimu kwa jamii juu ya shughuli za Kilimo ili watu wafaidike kiuchumi kwa kuuza mazao wanayozalisha na kutumia kwa chakula.

Mhe.Simon Odunga aliyazungumza hayo alipokuwa anafungua Mafunzo ya Ujasirimali wa Kilimo na Ufugaji tarehe 27/8/2018 katika Ukumbi wa Godown chini ya Shirika la FIDA ambapo Mafunzo hayo yamefanyika  tarehe 27-30/8/2018 kwa kuhusisha Wakulima  na Wafugaji.

“Wakulima wengi wanalima Kilimo ambacho hakiifadhi udongo,Kilimo hifadhi ni muhimu sana kwa Maafisa Kilimo kuwafundisha wananchi kilimo cha Kontua hasa  wale wanaoishi sehemu za miinuko na Maafisa Mifugo mkiwa kwenye Minada msiangalie upande wa nyama tu bali muangalie uanzishaji wa Viwanda vya ngozi kwani Tanzania inavyo vichache”aliongeza kwa kusema Mhe.Odunga.

Naye Mratibu wa Shirika la Fida International  Ndg.Lomayani Laizer amesema wamekuja wilaya ya  Chemba kuhamasisha Wananchi kujiunga katika Vikundi ili kuona matokeo yanayotolewa na huwa wanatumia eneo la kufanyia mafunzo kama Shamba  darasa ili jamii iweze kujifunza kwa kuona kuhusiana na mafunzo yanayotolewa.