"TUMESHIRIKI, TUMESHINDA NA TUMEKABIDHI USHINDI"

Posted on: September 3rd, 2025

Kauli hiyo imetolewa na Washiriki wa SHIMISEMITA 2025 kutoka Halmashauri ya Wilaya ya Chemba wakiongozwa na Mkuu wa Idara ya Utumishi Ndugu Hillary Mniachi mapema  tarehe 03, Septemba  2025 wakati wakikabidhi  kombe na medal za ushindi kwa Mkurugenzi Mtendaji wa Halmashauri ya wilaya ya Chemba Ndugu Hassan Mnyikah.

Akizungumza na Washiriki hao Mara baada ya kukabidhiwa  kombe na medal  Ndugu Mnyikah  amewapongeza washiriki hao kwa  kufanya vizuri  licha ya changamoyo kadhaa walizokutana nazo wakati wa mashindano hayo.

“Mmetuheshimisha Wanachemba, nimefurahi sana, na kwa ushindi huu nawaahidi kuwa mwakani tutajipanga vizuri ili mfanye vizuri zaidi “ amesema Mnyikah

Kwa upande wake Mkuu wa Idara ya Utumishi Ndugu Hillary Mniachi amesema kuwa katika mashindano ya SHIMISEMITA 2025 Halmashauri ya Wilaya ya Chemba iliibuka mshindi wa  kwanza kwa upande  wa uchoraji, mshindi wa kwanza kwa mbio za mita 100, mshindi wa pili mbio za mita 400,  na  mshindi wa kwanza mbio za mita 100 x 4 relay

Aidha, Ndugu Mniachi amemuomba  Mkurugenzi Mnyikah kuwatazama kwa jicho la kipekee Washiriki hao wa SHIMISEMITA 2025 kutokana na bidii  na uvumilivu waliouonyesha  katika mashindano hayo.

Akizungumza kwa niaba ya Washiriki wenzake Ndugu Jonson Limbe amemshukuru Mkurugenzi Mnyikah kwa kuwatia moyo na kuwawezesha kushiriki mashindano hayo ambapo pia ameahidi kuwa mwakani watafanya vizuri zaidi katika mashindano hayo kwani wanatarajia  kuanza mapema  maandalizi ya  kujinoa kwenye michezo  mbalimbali.