RAS DODOMA AWATAKA WATUMISHI CHEMBA KUZINGATIA SHERIA, TARATIBU NA KANUNI ZA UTUMISHI WA UMMA

Posted on: September 17th, 2025

Katibu Tawala Mkoa wa Dodoma Dkt. Khatibu Kazungu tarehe  17, Septemba  2025 amefanya ziara  katika Halmashauri ya Wilaya ya Chemba ikiwa ni sehemu ya kujitambulisha  kwa Watumishi wa  Serikali katika Halmashauri hiyo tangu alipoteuliwa na Mhe.  Rais Dkt. Samia Suluhu Hassan  mwezi Agosti, 2025 kushika Wadhifa huo.

Akizungumza na Watumishi wa  Serikali  Halmashauri ya Wilaya ya Chemba  Dkt. Kazungu  amewataka Watumishi  hao  wanapotekeleza majukumu yao kuzingatia kanuni, sharia na taratibu za utumishhi wa Umma sambamba na dira ya Taifa ya maendeleo  2050 na kuitafsiri kwa vitendo  Dira hiyo ili waweze kufikia malengo ya dira hiyo.

Aidha,  Dkt Kazungu  amewataka Viongozi wa  Halmashauri ya Wilaya ya Chemba  kuhakikisha kuwa Watumishi wanapata haki zao za msingi  katika utumishi ikiwa ni pamoja na haki ya kupata likizo,  Haki ya uhamisho, haki ya kulipwa posho na kuimarisha mahusiano mazuri kazini.

“Mkoa wetu wa Dodoma ndiyo Makao makuu ya Nchi, hivyo ni vyema Wananchi wawe na kipato cha uhakika ili kujikimu na familia zao hivyo sisi kama Viongozi ni lazima tubuni mikakati  hasa katika uzalishaji” amesema Dkt. Kazungu

Sambamba na hilo Dkt Kazungu ameielekeza Ofisi ya Mkurugenzi Chemba kutenga maeneo ili Wananchi wa Chemba waweze kushiriki kikamilifu katika uzalishaji wa mazao ya kilimo ili kuongeza kipato cha Mkoa na ajira.

Hata hivyo, Katibu Tawala huyo wa Mkoa wa Dodoma  akatumia fursa hiyo kuwakumbusha Watumishi wa Chemba kujitokeza  kwa wingi kupiga kura siku ya uchaguzi Mkuu  tarehe 29 Oktoba, 2025