MNYIKAH AONGOZA TIMU YA WATAALAM KUKAGUA MIRADI CHEMBA

Posted on: September 8th, 2025

Mkurugenzi Mtendaji wa Halmashauri ya Wilaya ya Chemba Ndugu Hassan Mnyikah  tarehe 8, Septemba 2025 ameongoza timu ya Wataalam wa Halmashauri ya Wilaya ya Chemba kukagua miradi ya maendeleo sekta ya afya na elimu robo ya nne Aprili – Juni 2024/2025.

Miradi iliyokaguliwa ni pamoja na ukamilishaji wa zahanati ya Takwa, Ujenzi wa kituo cha afya  Kata ya Ovada, ukamilishaji wa ujenzi wa vyumba 2 vya madarasa  shule ya msingi Lalta, ujenzi wa mradi wa miundombinu ya usafi wa mazingira  kituo cha afya Kwamtoro, ujenzi wa matundu ya vyoo shule ya msingi Mondo, ujenzi wa kituo cha afya  Dalai, ujenzi wa chumba cha darasa  shule ya msingi Hamai, ukamilishaji  wa ujenzi zahanati ya Songolo, ukamilishaji wa ujenzi wa zahanati ya Madaha, pamoja na ukamilishaji wa ujenzi wa madarasa 2 shule ya msingi Mchiga.

Akizungumza  katika mradi wa zahanati ya Takwa  Mkurugenzi Mnyikah   ameitaka Kamati ya ujenzi pamoja na Viongozi wa Kata na Vijiji kuendelea kuwaelimisha Wakazi  wa enea hilo kuchangia nguvu kazi zao ili ujenzi wa mradi huo uweze kukamilika.

“Tunatoa nafasi ya mwisho kwa Kijiji hiki kuchangia nguvu kazi ili ujenzi wa mradi huu uweze kukamilika, vinginevyo  fedha ambazo zipo benki shilingi milioni 60  tutazihamshia sehemu nyingine ambako wana uhitaji na utayari wa kuchangia nguvu kazi zao ili waweze kupata huduma kama hii” amesema Mkurugenzi Mnyikah

Sambamba na hilo Mnyikah ameitaka Kamati ya ujenzi pamoja na Viongozi

wa Kata  na Vijiji  Kata ya Kinyamsindo  kutokutumia njia moja tu ya kuchangia nguvu kazi bali endapo baadhi ya Wakazi wa eneo hilo wametingwa na majukumu na kupelekea kukosa muda wa kwenda kuchangia nguvu kazi basi Wakazi hao wachangie fedha ambazo zitatumika kunnuna mahitaji muhimu ya ujenzi wa mradi huo.

Aidha, Mkurugenzi Mnyika ameielekeza Kamati ya ujenzi pamoja na Viongozi wa Kata na Vijiji  Kata ya Kinyamsindo kutoa taarifa ya maendeleo ya  ya utekelezaji wa mradi huo hususan uchangiaji wa nguvu kazi za Wananchi mapema tarehe 10, Septemba 2025.

Katika hatua nyingine Mkurugenzi Mnyika amezipongeza kamati za ujenzi  pamoja na Viongozi wa Kata na Vijiji katika mradi wa kituo cha afya Ovada, ukamilishaji wa ujenzi wa vyumba 2 vya madarasa shule ya msingi Lalta, ujenzi wa mradi wa miundombinu ya usafi wa mazingira  kituo cha afya Kwamtoro kwa uchangiaji wa nguvu za Wananchi,  na utekelezaji wa miradi hiyo kwa kuzingatia ubora .

Hata hivyo ,  katika miradi yote aliyoitembelea kwa kushirikiana na timu ya Wataalam, Mnyika amehimiza utunzaji wa vifaa, uwekaji wa kumbukumbu za  mapokezi ya vifaa pamoja na utunzaji wa nyaraka za manunuzi.