Mkurugenzi Dkt. S. H Mashimba afanya ziara mapango na Chandama

Posted on: October 22nd, 2018

Na Shani Amanzi,

Mkurugenzi Mtendaji  wa Halmashauri ya Wilaya ya Chemba  Dkt.Semistatus H. Mashimba  amewataka wananchi  wachukue tahadhari mapema kipindi cha msimu wa mvua kwani Mamlaka ya Hali ya Hewa  imetabiri  kutakuwa na mvua  kubwa ikiwemo Mkoa wa Dodoma , ni vyema kuhama sehemu za mabondeni ili kuepukana  na mafuriko.

Aidha Dkt. Mashimba  amewataka Wakulima walioacha mazao yao shambani wakayavune na kuhifadhi sehemu salama.

  Kwa upande wa  Maafisa Kilimo,Mkurugenzi  Dkt.Mashimba amewaasa kuwafundisha njia bora za kilimo ikiwemo kilimo cha kontua ili kuepukana  na athari za mvua kubwa.

“Tafadhali Wananchi waliopata mavuno mnatakiwa kuyahifadhi vizuri, kuyatunza, kuachana na biashara ya kuyauza kupita kiasi mpaka akiba ikaisha ,pia acheni tabia ya kutumia nafaka yote  kwenye kutengeneza pombe za kienyeji  badala yake hifadhini chakula kitasaidia iwapo mafuriko yatatokea”aliongeza kwa kusema hayo Dkt.Mashimba.

Dkt.Mashimba amesema kwa upande wa Halmashauri yake ameamua kuendelea na njia bora ya kuwatembelea wananchi katika ngazi ya vijiji, kata na Wataalam wake ili jamii wazitambue shughuli wanazozifanya pamoja na kutatua kero za wananchi.

Dkt.Mashimba alifanya ziara hiyo na baadhi ya Wakuu wa Idara wa Halmashauri ya Wilaya ya Chemba  kwa  kutembelea Zahanati ya kijiji cha Mapango  lengo ni kufanya maadhimisho kwa ajili urekebishaji  na ukamilishaji wa zahanati hiyo.

 Pia walitembelea kijiji cha Chandama  kwa ajili ya kuhamasisha ujenzi wa wodi ya mama na mtoto.

Ziara hiyo ilifanyika tarehe 21 Oktoba, 2018.