"DC CHEMBA AWATAKA WATENDAJI KUITISHA MIKUTANO YA WANANCHI"

Posted on: July 15th, 2025

Mkuu wa Wilaya ya Chemba Mhe. Halima Okash amewataka Watendaji wa Vijiji na Kata kuitisha mkutano na  kuwasomea Wananchi  mapato na matumizi  pamoja na kuwafahamisha kuhusu fedha zilizopokelewa na miradi itakayotekelezwa kutokana na fedha hizo.

DC Okash ameyasema hayo Julai 15, 2025 akiwa katika ziara ya kusikiliza na kutatua kero za Wananchi Kata ya Makorongo na Kata ya Gwandi Wilayani Chemba.

"Wananchi wana haki ya kujua fedha zinazopokelewa, miradi  iliokusudiwa na kufuatilia ubora wa miradi hiyo kama inaakisi gharama halisi " Amesema DC Okash.

Aidha Mhe. Okash amesema Serikali ya awamu ya sita  inayoongozwa na Mhe. Rais Dkt. Samia Suluhu Hassan imewekeza fedha nyingi katika sekta ya elimu ili kuwawezesha Watoto wote kupata elimu bure kuanzia ngazi ya msingi, na sekondari ambapo pia Serikali inatoa mikopo kwa elimu ya juu, hivyo amewataka Wazazi na Walezi  kuzitafuta fursa za elimu kwa Watoto kwakuwa urithi mzuri wa Mtoto ni elimu  ili aweze kujisimamia na kuwasaidia Wazazi kusimamia shughuli za maendeleo.

"Chemba itajengwa na Wanachemba wenyewe, Chemba haitajengwa na Wageni somesheni Watoto wenu waje kuwasaidia kusimamia maendeleo katika Wilaya yenu" Amesema Mhe. Okash.

Sambamba na hilo, Mkuu huyo wa Wilaya  amesema kuwa Serikali ngazi ya Wilaya inatarajia kufanya sensa ya  mifugo na utambuzi wa Wakulima ambapo pia amewataka  Wafugaji kufuga kisasa na Wakulima kulima  kisasa na kuachana na ufufugaji na kilimo cha mazoea  

Hata hivyo, Mtendaji wa Kata ya Makorongo Ndugu  Andrew Chilewa amemshukuru Mhe. Rais Dkt. Samia Suluhu Hssan kwa kuwezesha utekelezaji wa miradi mbalimbali katika Kata hiyo  ikiwa ni pamoja na miradi ya Afya, miradi ya elimu, Maji, barabara   na kupeleka Watumishi 12 ambao wanaendelea kuwatumikia Wananchi.