Dc azindua zoezi la ugawaji wa vitambulisho vya wajasirimali wadogo chemba

Posted on: January 23rd, 2019

Na Shani Amanzi,

Mkuu wa wilaya ya Chemba Mhe.Simon Odunga amewaonya watu watakaotaka kufanya udanganyifu katika zoezi hili la kitaifa la ugawaji vitambulisho kwa Wajasirimali  Wadogo hatua kali za kisheria zitachukuliwa kwani watakuwa wamekwenda kinyume na taratibu.

Mhe.Simon Odunga aliyazungumza hayo alipokuwa anazindua zoezi la Ugawaji wa Vitambulisho kwa Wajasirimali Wadogo wilayani Chemba Tarehe 8/1/2019 katika Ukumbi wa Godown.

“Nataka zoezi hili lisizidi siku saba na kuhakikisha mapato yanaenda vizuri bila kusahau kuhakikisha makundi ya Wajasirimali Wadogo wanapata ikiwemo wa Magenge ya chakula,Mitumba,Mafundi cherehani,Wasusi na wengineo wanaostahili katika Tarafa zote ikiwemo Mondo,Goima,Kwamtoro na Farkwa za Chemba”aliongeza kwa kusema hivyo Mhe.Odunga.

Naye Mkurugenzi Mtendaji wa Halmashauri ya Wilaya ya Chemba Dkt.Semistatus H. Mashimba amesema katika zoezi la awali  walitambua Wajasirimali 105  ambapo katika kata ya Chemba walipata Wajasirimali 35,kata ya Kidoka Wajasirimali 40,kata ya Paranga Wajasirimali 30 na zoezi hilo limehakikiwa na Kitengo cha Biashara kwa kushirikiana na ofisi ya Mkurugenzi pamoja na Maendeleo ya Jamii.

Aidha Dkt.Semistatus H.Mashimba amesema” Kamati ya zoezi la Ugawaji wa Vitambulisho kwa Wajasirimali Wadogo ilizungunga wilaya nzima katika kutoa elimu na kuhakikisha zoezi hili linakuwa endelevu na tulibaini kuna watu walitaka kufanya udanganyifu na tuliweza kutatua jambo hilo  na kuhakikisha hali hiyo haitatokea tena”

Jumla ya Vitambulisho vya Wajasirimali Wadogo 2750 kutoka Ofisi ya Rais –Tamisemi  viligaiwa Mkoani ambapo walikabidhi  Ofisi ya Mkuu wa Wilaya ya Mhe.Odunga  ambapo aliagiza  Mkurugenzi Dkt.Mashimba kuratibu zoezi hilo la Ugawaji Vitambulisho kwa wilaya yake.